Mən hər zaman çalışıram ki, gündəlik həyatda olan problemləri həll edək

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın seçicilərlə görüşləri davam edir

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva çoxşaxəli ictimai fəaliyyəti ilə xalqımızın ehtiramını və məhəbbətini qazanıb. Bu ehtiram bütün fəaliyyətini xalqına həsr etmiş fədakar, vətənpərvər bir övladın, ləyaqətli vətəndaşın tam mənəvi haqqıdır. Elə insanlar var ki, öz varlıqları ilə el-obaya şan-şöhrət gətirirlər. Nəsildən-nəslə keçən xeyirxahlıqları, nəciblikləri ilə doğulduqları torpağın, sahibi olduqları vətənin şərəfini uca tuturlar.

Mehriban xanım Əliyeva idrakı ilə arif, elmi potensialı ilə ağıllı, parlaq zəkası ilə güclü, qətiyyəti və işgüzarlığı ilə qüdrətli, təfəkkür aydınlığı ilə dövlətli, başladığı möhtəşəm layihələri hünərvərliklə başa çatdırmaq səyi ilə iradəli, xalqımızın mədəniyyəti və təhsili üçün gördüyü əzəmətli işlərin neçə-neçə əsrlərlə yaşayacaq vüsəti qədər uzunömürlüdür. Mehriban xanım Əliyeva Azərbaycanın ictimai-siyasi həyatında xüsusi fəaliyyəti ilə seçilir. O, Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri, Azərbaycan Mədəniyyət Fondunun sədri, Azərbaycan Gimnastika Federasiyasının prezidenti, “Azərbaycan-İrs” jurnalının baş redaktorudur.

Azərbaycan qadınlarının ən gözəl xüsusiyyətlərini, mənəvi keyfiyyətlərini özündə birləşdirən Mehriban xanımın fəaliyyətinin bütün istiqamətlərinə nəzər salsaq, bir daha onun xalqımızın milli sərvətlərinə, tarixinə, mədəniyyətinə, incəsənət xəzinəsinə həssas münasibətinin şahidi olarıq.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, dördüncü çağırış Milli Məclisə Xəzər rayonundan deputatlığa namizəd Mehriban xanım Əliyeva seçicilərlə görüşlərini davam etdirir.

Mehriban xanım Əliyevanın Şüvəlana göstərdiyi diqqət və qayğı sayəsində qəsəbə son illər həm simasını dəyişib, həm də yeni inşa olunan sosial-mədəni obyektlər ilə xeyli zənginləşib. Heydər Əliyev Fondunun prezidenti tez-tez qəsəbədə olur, sakinlərin arzu və istəkləri, problemləri, görüşlərdə qaldırılan məsələlərin həlli ilə yaxından maraqlanır.

Bu dəfə də Heydər Əliyev Fondunun prezidenti Mehriban Əliyevanın qəsəbəyə gəlişinin məqsədi burada yaşayanların arzu və istəkləri ilə maraqlanmaq, problemlərin həllinə kömək göstərmək idi. Şüvəlan qəsəbə mədəniyyət evində keçirilən görüşdə seçicilər Mehriban Əliyevanı hərarətlə qarşılayıblar.

Xəzər rayonunda geniş abadlıq-quruculuq işlərinin getdiyini diqqətə çatdıran Mehriban xanım deyib ki, qazanılan uğurlar göz qabağındadır: “Bu illər ərzində biz sizinlə görüşürük. Bütün problemləri birlikdə müzakirə edirik, onların həlli yollarını axtarırıq və aradan qaldırmağa çalışırıq. Çox sevindirici haldır ki, ötən beş il ərzində Xəzər rayonunda 16 yeni məktəb binası tikilmiş və ya təmir olunmuşdur. Dörd park, altı bağça, xəstəxanalar, poliklinikalar, dörd mədəniyyət evi, tibb mərkəzləri, görülmüş abadlıq-quruculuq işlərinin əyani təsdiqidir. Bu istiqamətdə işlər davam etdirilir”.

Ağsaqqalların təşəbbüsü ilə Xəzər Rayon İnkişaf Fondunun yaradıldığını söyləyən Mehriban xanım Əliyeva, qurumun Heydər Əliyev Fondu ilə çox sıx əməkdaşlıq etdiyini, rayonun həyatında fəal rol oynadığını vurğulayıb. Heydər Əliyev Fondunun prezidenti deyib ki, mən hər zaman çalışıram ki, gündəlik həyatda olan problemləri həll edək, kiməsə yardım lazımdırsa, nəyəsə ehtiyacı varsa, onları təmin edək. Əlbəttə, problemlər hələ də var. Əminəm ki, qarşıdakı dövrdə bütün problemlər həllini tapacaq.

Bu gün Azərbaycanda məktəblərin yüksək səviyyədə olduğunu diqqətə çatdıran Mehriban xanım Əliyeva bildirib ki, ölkəmizdə, eləcə də, Xəzər rayonunda yeni inşa olunan təhsil müəssisələri ən müasir standartlara cavab verir.

Mehriban xanım Əliyeva deyib: “Biz birlikdə çalışmalıyıq ki, bütün problemləri çox qısa bir zamanda həll edək. Əhalinin yaşayış səviyyəsi daha da yaxşı olsun. Yeni iş yerləri, yeni müəssisələr açılsın. Su, qaz, elektrik təminatı daha da yaxşılaşsın. Ümidvaram ki, biz bütün problemləri birlikdə həll edəcəyik. Mən sizə minnətdarlığımı bildirmək istəyirəm. Çünki ötən beş ildə daim sizin diqqətinizi, qayğınızı və dəstəyinizi hiss etmişəm və bu da mənə işləməyə güc vermişdir”.

Qəsəbə sakini Sevil Haşımova Mehriban xanımın təşəbbüsü ilə qəsəbədə görülən işlərin minlərlə ailəyə sevinc gətirdiyini, sakinlər tərəfindən böyük rəğbətlə qarşılandığını deyib. O, bildirib ki, son illər qəsəbənin siması tamamilə dəyişib, insanların rahatlığı üçün hər cür şərait yaradılıb. Mehriban xanım Əliyevanın indiyə qədər gördüyü işləri minnətdarlıqla xatırladan S.Haşımova deyib ki, sizin kimi deputatımızın olması bizim üçün çox böyük xoşbəxtlikdir.

Sakin Bahar Əkbərova isə Mehriban xanımın deputatlıq fəaliyyətinin beş ili ərzində görülən işlərin gündən-günə abadlaşıb gözəlləşən Şüvəlanın simasında təzahür etdiyini söyləyib. O, qəsəbənin problemlərinin aradan qaldırılmasında göstərdiyi köməyə görə Mehriban xanıma minnətdarlıq edib, qarşıdakı parlament seçkilərində ona uğurlar arzulayıb.

Xoş sözlərə görə minnətdarlığını bildirən Mehriban xanım Əliyeva onun ən səmimi salamlarını bütün seçicilərə çatdırmağı xahiş edib. Hər görüşündə qəsəbə sakinlərinin diqqət və qayğısını hiss etdiyini deyən Mehriban xanım Əliyeva deyib: “Sizin sözləriniz mənim üçün çox dəyərlidir. Doğrudan da, bu beş il ərzində mən bunu hiss etmişəm. Hər görüşdə, hər dəfə ünsiyyətdə olanda mən bu sevgini, məhəbbəti hiss edirəm. Bu, mənə güc verir. Mən imkan dairəsində çalışmışam ki, bacardığımı edim”.

Təhsilin cəmiyyətimizdə böyük rolunu vurğulayan Mehriban xanım Əliyeva bildirib ki, son illər məktəblərin təmiri üçün böyük işlər görülüb: “Bir il ərzində rayondakı qalan bütün məktəblər də təmir olunacaqdır”.

Məktəblərin maddi-texniki bazasının yaxşılaşdığını diqqətə çatdıran Heydər Əliyev Fondunun prezidenti deyib ki, biz gərək təhsilin keyfiyyəti haqqında düşünək: “Bu, tamamilə yeni bir məqsəddir. Yəni, bütün məktəblərdə kompyuter olmalıdır. Bütün məktəblərdə müasir təhsil üçün nə lazımdırsa hamısı olmalıdır”.

Azərbaycanın bütün bölgələrində geniş abadlıq-quruculuq işlərinin aparıldığını deyən Mehriban xanım Əliyeva rayon mərkəzlərində gedən inkişafın paytaxt Bakıdan geri qalmadığını diqqətə çatdırıb: “Bunların hamısı yalnız sizin dəstəyinizlə olan işlərdir. Ona görə, bir daha mən Sizə öz minnətdarlığımı bildirirəm və əmin etmək istəyirəm ki, gələcəkdə də əlimdən gələni edəcəyəm. Ümidvaram ki, biz bütün imkanlarımızı, gücümüzü səfərbərliyə alıb qalan problemləri də birlikdə həll edəcəyik”.

* * *

Zirə qəsəbə nümayəndəliyinin qarşısında keçən görüşdə seçicilər Mehriban xanım Əliyevanı hərarətlə qarşılayıblar. Seçiciləri ürəkdən salamlayan Heydər Əliyev Fondunun prezidenti onları yenidən görməkdən şad olduğunu söyləyib. Mehriban xanım Əliyeva deyib ki, burada gördüyüm hər şey məni çox sevindirir. Zirə qəsəbəsində çox gözəl, təmiz, geniş küçələr, parklar yaradılıb. Ümumiyyətlə, Xəzər rayonunda gedən bütün abadlıq, quruculuq işləri göz qabağındadır.

Seçiciləri ilə əvvəlki görüşlərini xatırladan Mehriban xanım Əliyeva Xəzər rayonunda təhsil, səhiyyə, infrastruktur məsələlərinin hər zaman diqqət mərkəzində saxlanıldığını, problemlərin həllini tapdığını vurğulayıb. Mehriban xanım Əliyeva deyib ki, ötən beş il ərzində Xəzər rayonunda 16 məktəb yenidən qurulub. Parklar, mədəniyyət evləri, şadlıq sarayları, poliklinikalar, xəstəxanalar, internat məktəbləri, tədris mərkəzləri, mədəniyyət evləri istifadəyə verilib. Bütün bu işlər, əlbəttə, məni çox sevindirir.

Xəzər Rayon İnkişaf Fondunun Heydər Əliyev Fondu ilə birlikdə Zirə qəsəbəsində bir sıra layihələr həyata keçirdiyini söyləyən Mehriban xanım Əliyeva deyib ki, Bakı kəndlərinin sosialyönümlü problemlərinin həlli hər zaman diqqət mərkəzindədir: “Qəsəbələrin içməli su, təbii qaz, elektrik enerjisi ilə təminatı yaxşılaşır. Əlbəttə, problemlər də mövcuddur. Arzum odur ki, bu problemlər çox qısa bir zamanda öz həllini tapsın. Yeni iş yerləri açılsın, yeni müəssisələr fəaliyyətə başlasın, əhalinin həyat səviyyəsi daha da yaxşılaşsın. Əminəm ki, biz buna hökmən nail olacağıq”.

Heydər Əliyev Fondunun prezidenti uşaqların keyfiyyətli təhsilə yiyələnmələrinin vacibliyini diqqətə çatdıraraq, bu sahədə işlərin davam etdiriləcəyini söyləyib: “Bu yaxınlarda Zirədəki Nüsrət Yaqubov adına 120 nömrəli orta məktəbin binasını Heydər Əliyev Fondunun dəstəyi ilə yenidən təmir edəcəyik. Bu gün məktəblərin maddi-texniki bazası gücləndirilir. Hazırda Xəzər rayonunda təmirsiz olan 2-3 məktəb də bu yaxınlarda əsaslı təmir olunacaq. Artıq demək olar ki, məktəblərin yenidən qurulması işlərini başa çatdırmışıq. Növbəti mərhələdə biz artıq təhsilin keyfiyyətinin yüksəldilməsi üzərində fikirləşməliyik. Təhsilin keyfiyyətini dünya standartlarına çatdırmalıyıq. Bütün məktəblərdə kompyuter olmalıdır. Uşaqlar xarici dilləri yaxşı öyrənməlidirlər. Yəni, bunlar yaxın gələcək üçün qarşımıza qoyduğumuz vəzifələrdir”.

Mehriban xanım Əliyeva seçicilərin hər zaman ona dəstək olduqları üçün təşəkkür edərək deyib: “Mən bu gün sizə bir daha dərin minnətdarlığımı bildirmək istəyirəm. Çünki bütün işlərdə mən hər zaman sizin dəstəyinizi hiss etmişəm. Bu da mənə güc vermişdir. Əldə edilən bütün qələbələr, uğurlar bizim birgə qələbələrimizdir. Mən inanıram ki, mövcud problemləri də biz bütün imkanlarımızı, gücümüzü səfərbər edərək aradan qaldıracağıq. Beləliklə, qəsəbəniz bundan da gözəl olacaqdır”.

Mehriban xanım Əliyeva qəsəbə sakinlərini narahat edən problemlərlə maraqlanıb, onların həllinə yardım etməyi çalışacağını bildirib.

Qəsəbə sakini Tamilla Məmmədova Mehriban xanım Əliyevanın fəaliyyətinin yüksək qiymətləndirildiyini söyləyib, onlara göstərilən diqqət və qayğıya görə sakinlər adından minnətdarlığını bildirib.

Sonda Mehriban xanım Əliyeva seçiciləri ilə xatirə şəkli çəkdirib.

* * *

Zirəyə hər gəlişində Mehriban xanım Əliyeva bu qəsəbənin ən qocaman sakinlərindən biri olan Badam Bədəlova ilə görüşür. Qəsəbəyə bu gəlişdə də Mehriban xanım Badam nənənin qonağı olub. Mehriban xanım Əliyeva və Badam nənə çay süfrəsi arxasında səmimi söhbət ediblər.

Mehriban xanım Əliyevanı növbəti dəfə Zirə qəsəbəsində görməkdən şad olduğunu bildirən Badam nənə ona cansağlığı və fəaliyyətində daha böyük uğurlar arzulayıb.

O. Yolçuyev

Yeni Azərbaycan.- 2010.- 31 oktyabr.- № 203.- S. 3.